Միանգամից ասում են` ոչ, ու չեն բացատրում`ինչու. Արագած Ախոյան

ԱԺ պատգամավոր Արագած Ախոյանը Yerkir.am-ի հետ զրույցում հայտնեց, որ իրենց` Արագածոտնի մարզում ինքն ակտիվ մասնակցություն է ցուցաբերում սահմանադրական բարեփոխումների քարոզարշավի շրջանակներում և ամեն ինչ անում է, որ մարդիկ կողմ քվեարկեն նոր Սահմանադրությանը:

«Արագածոտնի մարզում ունենք որոշակի հեղինակություն և վստահություն, մարդիկ մեզ հավատում են, մարդիկ մեզ լսում են, մեր ասածներն ընկալում են այնպես, ինչպես մենք ենք ներկայացնում: Բացատրում ենք` ինչ են իրենցից ներկայացնում բարեփոխումները: Մի քանի շեշտադրումներ կան, մի քանի դրույթներ կան, որոնց վրա ժողովուրդը կենտրոնացել է: Ցավոք, մարդիկ կան, ովքեր միանգամից ասում են` «ոչ», ու չեն բացատրում` ինչու, կամ էլ ասում են` այո, ու չեն բացատրում` ինչու»,- ասաց պատգամավորը և հավելեց, որ ինքն իրազեկող հանդիպումներ է  ունենում:

Ախոյանի խոսքով`«Ոչ»-ի կողմնակիցները չունեն հստակ բացատրություն, թե ինչու բացասական կարծիք ունեն սահմանադրական բարեփոխումների վերաբերյալ: «Մարդիկ ավելի շատ անտարբեր են, քան դեմ սահմանադրական բարեփոխումներին»,- ասաց նա: