Հայաստանյան պատվիրակությունը գնում է ԵԽԽՎ` միայն հետևանքները վերացնելու. Զարուհի Փոստանջյան

Այսօր խորհրդարանական ճեպազրույցների շրջանակներում խորհրդարանական շաբաթն ամփոփեց ԱԺ «Ժառանգություն» խմբակցության ներկայացուցիչ Զարուհի Փոստանջյանը: Նա բացասական առումով հիշատակեց 2016 բյուջեի նախագծի քննարկումը:

Պատգամավորը հիշեցրեց, որ բյուջեի նախագծի քննարկման ժամանակ ակնհայտ դարձավ, որ չի լինելու աշխատավարձերի, թոշակների բարձրացում, և այս ամենի արդյունքում մասսայական արագաղթ է տեղի ունենալու:

Փոստանջյանի խոսքով`Հայաստանում սոցիալ-տնտեսական ճգնաժամի խորացումն անխուսափելի է, և մեկ միլիոնից ավելի մարդ մեր երկրում աղքատ է:

Նա նշեց նաև, որ իր ներկայացրած`«Թուրքիայի Հանրապետության կողմից հայրենի բնօրրանի` Հայաստանի տարածքների բռնազավթումը (օկուպացիան) և հայերի մեծ հայրենազրկումը դատապարտելու մասին» նախագծի չընդունումը լուրջ վնաս էր մեր դիվանագիտական քաղաքականությանը: Պատգամավորի կարծիքով` օրենքով ամրագրված իր հայտը չընդունելը սխալ է, և դա էլ պատճառներից մեկն է, որ ԵԽԽՎ-ում կա նման խայտառակ, հակահայկական զեկույց:

«Սա ՀՀ արտաքին դիվանագիտության վատ աշխատելու արդյունքն է: Ցանկալի է, որ ԵԽԽՎ հայաստանյան պատվիրակությունն ավելի լավ աշխատի, բայց պատվիրակությունը չի կարող գործել անկախ մեր ընդհանուր դիվանագիտությունից: ՀՀ պատվիրակության անդամները գործուղվում են, սակայն, նրանք գնում են` միայն հետևանքները վերացնելու, մինչդեռ` մեր դիվանագիտությունն այստեղ պետք է պատշաճ աշխատի, ինչը չի անում»,- ասաց Փոստանջյանը: