Թուրք ոստիկանները հարձակվել են քրդամետ կուսակցության համանախագահի վրա

Ներկայիս Թուրքիայի տարածքում գտնվող հայկական Տիգրանակերտ (Դիարբեքիր) քաղաքի Սիլվան շրջանում, ուր 10 օր է՝ արգելված է փողոց դուրս գալ, շարունակվում են բախումներիը քուրդ զինյալների և թուրք ոստիկանների միջև:

Ըստ Demokrathaber-ի՝ թուրք ոստիկանները հարձակվել են Սիլվան այցելած՝ քրդամետ Ժողովուրդների դեմոկրատական կուսակցության կին համանախագահ  Ֆիգեն Յուքսեքդաղի և այլ պատգամավորների վրա: Ոստիկաններն անգամ արցունքաբեր գազ են կիրառել նրանց նկատմամբ, ինչի հետևանքով կան տուժածներ: Եղել են նաև ձերբակալություններ:

Հիշեցնենք, որ այսօր օդանավակայանում ձերբակալվել էր նաև վերոնշյալ կուսակցության խոսնակը, ով մեղադրվում էր «կազմակերպության քարոզչություն իրականացնելու» մեջ: Նրան ժամեր անց ազատ էին արձակել: