Որևէ պահանջատիրական բան չկար Լավրովի այցի մեջ. Վահրամ Բաղդասարյան

Արդեն տեղեկացրել ենք, որ երեկ Երևանում կայացավ Նալբանդյան-Լավրով համատեղ մամուլի ասուլիսը: ՀՀԿ խմբակցության ղեկավար Վահրամ Բաղդասարյանը Yerkir.am-ի հետ զրույցում անդրադարձավ այդ ասուլիսի ընթացքում ՌԴ ԱԳ նախարար Սերգեյ Լավրովի` Ղարաբաղյան կարգավորման վերաբերյալ դիտարկումներին:

Ըստ Բաղդասարյանի`Լավրովը հստակ հայտարարեց, որ Ղարաբաղյան հիմնահարցով զբաղվող լիազոր մարմինը Մինսկի խումբն է: «Լավրովն այլ կազմակերպությունների խնդրում է, որ իրենց չվերագրեն լիազորություններ և չշեղեն այդ գործընթացը հիմնական ուղղությունից»,- ասաց նա:

Ըստ ՀՀԿ-ականի՝ Լավրովը պարզ ասում է, որ որոշ կազմակերպությունների որոշ ներկայացուցիչներ բիզնեսի են վերածել կարգավորման գործընթացը: «Ինչ-որ մի հայտարարություն մտցնելով` փորձում են գումարի վերածել և օգտվել այդ փաստաթղթից, բայց հիմնական հարց լուծողը հենց Մինսկի խումբն է, և որ այդ լիազորությունը տրված է Մինսկի խմբին: Լավրովի ասածը մեսիջ չէր, ուղիղ, պարզ հայտարարություն էր»,- ասաց Բաղդասարյանը:

ՀՀԿ խմբակցության ղեկավարի խոսքով`Լավրովի այս այցը հերթականներից մեկն էր և որևէ այլ նպատակ չի հետապնդում: «Քննարկվել են մեր հետագա արտաքին հարաբերությունների հետ կապված հարցեր և Ղարաբաղյան հարցի հետ կապված խնդիրներ: Որևէ պահանջատիրական բան չկար նրա այցի մեջ»,- եզրափակեց Բաղդասարյանը: