Էլեկտրաէներգիայի թանկացումը բյուջեի վրա նստեց 4 միլիարդ դրամ

Այսօր ԱԺ հանձնաժողովներում ՀՀ ֆինանսների փոխնախարար Պավել Սաֆարյանը ներկայացնում էր գիտության, կրթության, մշակույթի ու սպորտի ոլորտների համար 2016թ. բյուջեով նախատեսված հատկացումները:

Նրան հարց ուղղեց ՕԵԿ խմբակցության ղեկավար Հեղինե Բիշարյանը՝ բյուջեում որքա՞ն գումար պահանջվեց ավելացնել էլեկտրաէներգիայի սակագնի բարձրացման արդյունքում:

Պավել Սաֆարյանը պատասխանեց, որ կառավարման ամբողջ համակարգի մասով էլեկտրաէներգիայի սակագնի բարձրացման արդյունքում նախատեսված է ավելացնել 4 միլիարդ դրամ:

Հեղինե Բիշարյանը նաև հարցրեց, թե Հայոց ցեղասպանության 100-րդ տարելիցին հատկացված գումարն ամբողջությամբ ծախսվե՞լ է, թե՞ ոչ, հատկացված գումարը բավարարե՞ց, թե անհրաժեշտ եղան նոր ծախսեր:

Պավել Սաֆարյանը պատասխանեց, որ դրամաշնորհային ու բարեգործական հատկացումների արդյունքում հաջողվեց նախատեսված գումարը տնտեսել և այն թողնել բյուջեում: