Կ.Պոլսում անցկացվող լուսանկարչական փառատոնում հատուկ տեղ է հատկացվել Արա Գյուլերին

Այս օրերին Կ.Պոլսում ընթանում է մինչ օրս այնտեղ կազմակերպված ամենալայնամասշտաբ լուսանկարչական միջոցառումը՝ Բեշիքթաշի երկրորդ միջազգային լուսանկարչական փառատոնը՝ հայտնի նաև «Ֆոտոստամբուլ» անվամբ:

Բեշիքթաշի  թաղապետարանի պաշտոնական կայքի հաղորդմամբ՝  փառատոնին մասնակցում է շուրջ  60 լուսանկարիչ` ԱՄՆ-ից, Ասիայից, Եվրոպայից և Թուրքիայից:

Փառատոնն անցկացվում է քաղաքի փողոցներում ու հրապարակներում, ինչպես նաև՝ Օրթաքյոյի մանկատանն ու մշակույթի կենտրոնում: Նախատեսված են 487 ցուցահանդես, 15 կլոր սեղան և քննարկում, 100 լուսանկարչական ցուցադրություն և մի շարք այլ մշակութային միջոցառումներ: Փառատոնի այս տարվա հիմնական թեման «Այլ կյանքեր»-ն է:

Թաղապետարանի հայտարարության մեջ նշվել է, որ փառատոնում հատուկ տեղ է հատկացվել պոլսահայ հայտնի լուսանկարիչ Արա Գյուլերին: Ցուցահանդեսի մուտքին տեղադրվել է Գյուլերի հսկայական պատկերը, իսկ փողոցում ցուցադրված է Գյուլերի «Կորուսյալ Ստամբուլ» խորագրով լուսանկարների շարքը:

Ցուցահանդեսի ընթացքում կներկայացվեն վարպետի՝ մինչ օրս անհայտ, չցուցադրված աշխատանքները: Գյուլերի լուսանկարների վերաբերյալ նաև հատուկ ժողով-քննարկում է կազմակերպվելու:

Միջոցառումը մեկնարկել է հոկտեմբերի 9-ին և կավարտվի նոյեմբերի 8-ին: