Դատարանը մերժեց դատախազի բողոքը. Լիսկայի վարորդի որդին կմնա ազատության մեջ

Yerkir.am-ի տեղեկություններով՝ այսօր ՀՀ վերաքննիչ քրեական դատարանը մերժել է Սդղի գյոլում տեղի ունեցած միջադեպի գործով վերահսկող դատախազի բողոքն ու անփոփոխ թողել առաջին ատյանի դատարանի վճիռը, որով գործով մեղադրյալ Դերենիկ Հակոբյանի խափանման միջոց կալանավորումը փոխարինվել էր գրավով: Այս տեղեկությունը մեզ հետ զրույցում հաստատեց Հակոբյանի պաշտպան Արմեն Խաչատրյանը:

 Հիշեցնենք, որ Դերենիկ Հակոբյանը Սյունիքի մարզպետ Սուրիկ Խաչատրյանի վարորդի որդին է:

Քննության տվյալներով` Յուրի Մանուչարյանը, Դերենիկ Հակոբյանը մի քանի այլ անձանց հետ հարվածներ են հասցրել Մուշեղ Զաքարյանի մարմնի տարբեր մասերին՝ պատճառելով միջին ծանրության մարմնական վնաս։ Յուրիկ Մանուչարյանին եւ Դերենիկ Հակոբյանին հունիսի 12-ին մեղադրանք էր առաջադրվել ՀՀ քրեական օրենսգրքի 113-րդ հոդվածի 2-րդ մասի 3-րդ կետով, եւ նույն օրը քննիչը միջնորդություն էր ներկայացրել դատարան՝ նրանց նկատմամբ, որպես խափանման միջոց, կալանավորումը կիրառելու վերաբերյալ, ինչը բավարարվել էր: Սակայն հոկտեմբերի 5-ին  Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը բավարարել էր Հակոբյանի պաշտպանի միջնորդությունը և նրան 1 մլն դրամ գրավի դիմաց ազատ արձակել: