Արծվիկ Մինասյանն առաջարկում է բարեփոխումներ կատարել հետբուհական մասնագիտական համակարգում

Այսօր` ԱԺ հայտարարությունների ժամին, ԱԺ ՀՅԴ խմբակցության պատգամավոր Արծվիկ Մինասյանը խոսեց հետբուհական մասնագիտական համակարգում ռեֆորմներ անցկացնելու կարևորության մասին:

Ըստ պատգամավորի` այդ համակարգը ներկայումս հակասում է միջազգային չափանիշներին, մասնավորապես` եվրոպական բարձրագույն կրթության տարածքի կողմից առաջարկվող մոտեցումներին:

«Ոլորտի կարգավորումը չափազանց կենտրոնացված է, ինչը չի նպաստում ոլորտի զարգացմանը, գիտական աստիճանաշնորհման համակարգը չի համապատասխանում միջազգային չափանիշներին: Հայաստանում գիտական աստիճանները շնորհում է ԲՈՀ-ը` զրկելով բուհերին ինքնավարությունը լիարժեք իրացնելու հնարավորությունից»,- ասաց Արծվիկ Մինասյանը:

Նրա խոսքով՝ այս ոլորտում աշխարհի լավագույն փորձն ընդգրկված է ՀՅԴ-ի կողմից մշակված` բարեփոխումների փաթեթում, որի վերաբերյալ ՀՅԴ-ն առաջիկայում սկսելու է քննարկումներ: