Հովհաննես Զարդարյանի ստեղծագործությունների ցուցադրությունը` ՀԱՊ-ում

Սեպտեմբերի 24-ին, ժամը 15-ին, Հայաստանի ազգային պատկերասրահում կբացվի հայ դասական գեղանկարչության նշանավոր ներկայացուցիչ Հովհաննես Զարդարյանի (1918-1992 թ.թ.) ստեղծագործությունների ցուցահանդեսը, որը կրում է «Գաղթ» խորագիրը և նվիրվում Հայոց ցեղասպանության 100-րդ տարելիցին: Ցուցադրությունը կգործի մինչև նոյեմբերի 24-ը. կներկայացվի ավելի քան վաթսուն գեղանկարչական և գրաֆիկական աշխատանք (ընտանիքի հավաքածու):

Հովհաննես Զարդարյանը ստեղծագործական կյանքին զուգահեռ կրթել է նկարիչների մի քանի սերունդ: Վարպետի աշխատանքները պահպանվում են Հայաստանի ազգային պատկերասրահում, աշխարհի տարբեր թանգարաններում և մասնավոր հավաքածուներում: Ներկայացվող շարքի ստեղծագործությունները թեմատիկ և գեղարվեստական առումով առանձնանում են մինչ այժմ հայտնի գործերից: Ցուցահանդեսը հնարավորություն կընձեռի մեկ անգամ ևս վերանայելու, վերարժևորելու նկարչի գեղարվեստական ժառանգությունը: