ՀՀ և ԼՂՀ ԶՈւ անձնակազմերը քննարկել են թշնամու դիվերսիոն խմբերի ներթափանցման կանխմանը միտված ծրագրեր

Հայաստանի Հանրապետության և Լեռնային Ղարաբաղի` հայկական 2 hանրապետությունների ԶՈւ անձնակազմերը ՀՀ պաշտպանության նախարարությունում հրավիրված  խորհրդակցությանը քննարկել են թշնամու դիվերսիոն խմբերի ներթափանցման կանխմանը միտված ծրագրեր:

 Այս մասին տեղեկացնում է ՀՀ պաշտպանության նախարարության լրատվական ծառայությունը:

 Խորհրդակցության ընթացքում անդրադարձ է կատարվել հաշվետու ժամանակահատվածում զինանձնակազմի մարտական և զորահավաքային պատրաստականության բարձրացմանը միտված, մարտունակության պատշաճ մակարդակի ապահովման, մարտական պատրաստության հանկարծակի ստուգումների և առաջնագծում անձնակազմի զգոնության պահպանման, մարտական հերթապահության կրման պայմանների կատարելագործման, հենակետերի լրակահավորմանն ուղղված մեծածավալ միջոցառումներին:

 ՀՀ ԶՈՒ և ԼՂՀ ՊԲ փոխգործակցության և գործողությունների համադրման շրջանակում իրականացվող համալիր միջոցառումների համատեքստում քննարկվել են նաև հակառակորդի դիվերսիոն-հետախուզական խմբերի ներթափանցումը կանխելուն նպատակաուղղված ընթացիկ և հեռանկարային ծրագրերը: Արծարծված հարցերի և բարձրաձայնված խնդիրների վերաբերյալ հնչել են մի շարք առաջարկություններ, նախանշվել են երկկողմ գործակցության զարգացման հիմնական աշխատանքային ուղղությունները: