Իրավապահները կարող են միջնորդել, որ Շուշանիկ Բախշյանի լիազորությունները դադարեցվեն

ՀՀ առողջապահության նախարար Արմեն Մուրադյանը Yerkir.am-ի հետ զրույցում անդրադարձավ «Շենգավիթ» բժշկական կենտրոնի բժշկուհի Շուշանիկ Բախշյանի հետագա գործունեությանը: Հիշեցնենք, որ Շուշանիկ Բախշյանին 26-ամյա ծննդկան Մերի Մարգարյանի հարազատները մեղադրում են կնոջ և նորածնի մահվան մեջ և պահանջում դադարեցնել բժշկի գործունեությունը:

«Նրա աշխատանքային լիազորությունները դադարեցնելու համար քննիչի որոշում պետք է լինի: Եթե նման որոշում կայացվի, այդպես կլինի: Իրավապահ մարմինները կարող են նման առաջարկով հանդես գալ  կամ միջնորդել մեզ, որ այդպես լինի: Դա պետք է նրանց որոշումը լինի»,- ասաց նախարարը:

Նա նշեց նաև, որ ինքը երկու շաբաթ առաջ հանդիպել է Մերի Մարգարյանի հոր հետ: «Ես նրան խոստացել եմ, որ շատ անաչառ, արհեստավարժ քննարկում է լինելու, և մենք  շատ հետևողական ենք լինելու այդ հանձնաժողովի աշխատանքներին: Եվ հաշվի առնելով, այն, որ իրավապահներն են այն վարում, մեր գործն այս պարագայում զուտ մասնագիտական մասնակցությունն է, և կարծում եմ, որ այդպես էլ կինի»,- նշեց նախարարը: