6 ժամ աշխատելուց հետո պայմանավորվել եմ նախագահի հետ. Հովիկ Աբրահամյան

Այսօր կառավարության նիստում արդարադատության նախարարի պաշտոնակատար Արսեն Մկրտչյանը ներկայացրեց սահմանադրական փոփոխությունների նախագծի վերաբերյալ կառավարության առաջարկներին հավանություն տալու մասին որոշումը:

Որոշման նախագծով առաջարկվում է հավանություն տալ սահմանադրական փոփոխությունների նախագծի վերաբերյալ կառավարության առաջարկներին, որոնցում ամփոփված են հանրապետական գործադիր մարմնի և պետական կառավարման այլ մարմինների դիրքորոշումը նախագծի վերաբերյալ:

«Մեծարգո\' վարչապետ, նախագծի վերաբերյալ առաջարկությունները ամփոփվում են և այժմ գտնվում վերաամփոփման փուլում: Խնդրում ենք ժամկետ` այդ կարծիքները ամփոփելու համար»,- ասաց Արսեն Մկրտչյանը:

Վարչապետը հավելեց. «Երեկ մենք աշխատել ենք` պարոն Մկրտչյանը, պարոն Գաբրիելյանը և Դավիթ Հարությունյանը: Մոտ վեց ժամ նայել ենք բոլոր առաջարկությունները: Կան առաջարկություններ, որոնք արժանի են քննարկման: Այսօր հանրապետության նախագահի հետ պայմանավորվել եմ, որ ԱԺ-ի հետ կազմակերպենք քննարկումներ՝ մի քանի օր: Նաև նախարարներն ու գերատեսչությունների ղեկավարները թող մասնակցեն, ու փորձենք ընդհանուր հայտարարի գալ, որից հետո ես կստորագրեմ, ու կուղարկենք ԱԺ»: