Թուրքիայում գյուղի 71 պաշտպաններ հրաժարվել են կատարել քուրդ զինյալներին սպանելու հրամանը

Թուրքիայի Շըրնաք քաղաքի Չեման գյուղը պաշտպանող 71 մարդ հրաժարական է ներկայացրել գյուղապետարանին՝ չցանկանալով կատարել Քրդական բանվորական կուսակցության զինյալների հետ փոխհրաձգության մեջ մտնելու հրամանը:

Ըստ Demokrathaber-ի՝ գյուղի պաշտպանները հայտնել են, որ զինվորները գյուղի պաշտպանության հարցում տարիներ շարունակ օգտագործել են իրենց, և իրենք այժմ դիմել են նման քայլի, քանի որ այլևս հրաժարվում են սպանել «իրենց եղբայրներին»: «Մենք մաս չենք կազմելու վերսկսված պատերազմին»,- նշել են նրանք: 

Գյուղապետն ընդունել է նրանց հրաժարականները` ասելով, որ դա կապված չէ իր հետ, այլ զուտ զինվորական խնդիրներ են:

Հիշեցնենք, որ ՔԲԿ զինյալները Շըրնաքում համեմատաբար ավելի շատ հարձակումներ են իրականացրել, որոնց ընթացքում նախորդ շաբաթների ընթացքում սպանվել և վիրավորվել էին սպաներ, զինվորներ: