Վերջին օրերին մի քանի դիվերսիոն-հետախուզական փորձեր են կանխվել. Սեյրան Օհանյան

 Կառավարության այսօրվա նիստում ՀՀ Պաշտպանության նախարար Սեյրան Օհանյանն անդրադարձավ հայ-ադրբեջանական և ղարաբաղա-ադրբեջանական սահմանին տիրող լարվածությանը: Օհանյանի բնորոշմամբ` Ադրբեջանում կայացած Եվրոպական խաղերից հետո սահմանին լարվածությունը պարբերաբար աճում է, ապա` իջնում:

Նախարարը նշեց, որ մեր հարևանները փորձում են լարվածություն ստեղծելով քաղաքական ու տնտեսական դիվիդենտներ շահել: Օհանյանը փաստեց, որ վերջին օրերին հակառակորդը կրակում է խոշոր հրաձգային զենքերից և ավելի բարձր խոցման աստիճան ունեցող ականանետեր է կրառում:

Նա ասաց նաև, որ վերջին օրերին մեր սահմանապահների կողմից մի քանի դիվերսիոն-հետախուզական փորձեր են կանխվել:

«Հայկական զինված ուժերի ստորաբաժանումները հաստատակամ են, իրենց պարտականությունները գերազանց կատարում են: Ցավոք սրտի, մենք վերջին օրերին ունեցանք մեկ կորուստ: Բայց, այնուամենայնիվ, մենք մեր առջև դրված խնդիրները կատարում ենք», – եզրափակեց Օհանյանը: