Հայտնի է Ավետիսյաների սպանության մեջ մեղադրվող Պերմյակովի գործով դատական բաց նիստի օրը

Երեւանում տեղակայված  5-րդ կայազորային ռազմական դատարանը կես տարով երկարաձգել է Գյումրիում Ավետիսյանների ընտանիքի սպանության մեջ մեղադրվող ռուս զինծառայող Վալերի Պերմյակովի կալանքի ժամկետը։ Այս մասին ՏԱՍՍ-ին հայտնել է դատարանի մամուլի քարտուղար Ալյոնա Կատկալոն։

Վերջինիս խոսքով՝ Պերմյակովի կալանքի ժամկետը երկարաձգվել է մինչև 2016թ. հունվարի 30-ը։ Դատավորի վճռով Պերմյակովի գործով բաց դատական նիստը նշանակվել է 2015թ. օգոստոսի 12-ին:
Նշենք, որ ռուսական կողմի իրակակացրած նախաքննության նախնական տվյալներով, Պերմյակովը ինքնակամ լքել էր զորամասը, զենքը ձեռքին դուրս եկել  Գյումրի, որտեղ տներից մեկում զենքի կրակոցներով սպանել է Ավետիսյանների ընտանիքի 6 անդամներին, վիրավորել 6 ամսական փոքրիկին, որը հետո հիվանդանոցում մահացել է: Պերմյակովը ձերբակալվել էր հենց հանցագործության օրը, հայ-թուրքական սահմանին: