Լրատվամիջոցների ներկայացուցիչների վրա հարձակումների ծավալը գերազանցել է 2008թ. ցուցանիշը

Այսօր Խոսքի ազատության պաշտպանության կոմիտեի նախագահ Աշոտ Մելիքյանը  ներկայացրեց ԽԱՊԿ 2015թ. առաջին կիսամյակի զեկույցը Հայաստանում խոսքի ազատության վիճակի և լրագրողների ու ԶԼՄ-ների իրավունքների մասին:

Նա նշեց, որ 2015 թվականի առաջին կիսամյակը բավական լարված էր լրատվամիջոցների ու լրագրողների համար: Տարվա առաջին կիսամյակում արձանագրվել է լրատվամիջոցների և լրագրողների իրավունքների խախտումների 51 դեպք, որը 7- ով ավելի է, քան 2014 թվականի նույն ժամանակահատվածում արձանագրված դեպքերը:

Մելիքյանն անդրադարձավ Բաղրամյան փողոցում անցկացված ցույցերին, երբ մեկ օրվա ընթացքում  ֆիզիկական բռնության է ենթարկվել տարբեր լրատվամիջոցների 13 աշխատակից և 10 լրագրող:  «Լրատվամիջոցների ներկայացուցիչների վրա հարձակումների այս ծավալն աննախադեպ է և գերազանցում է նույնիսկ 2008 թվականի ցուցանիշը»,- ասաց նա:

Ինչ վերաբերում է  ԶԼՄ-ների ֆինանսական վիճակին, Աշոտ Մելիքյանի խոսքով՝ դա  չի կարելի բարենպաստ համարել: «Ֆինանսական դժվարությունները քրոնիկական հիվանդություն են դարձել հայկական լրատվամիջոցների ճնշող մեծամասնության համար: Լրատվամիջոցների ղեկավարների մտահոգություններն էլ ավելի են խորացել` էլեկտրաէներգիայի գալիք թանկացման հետ կապված, քանի որ դա անխուսափելիորեն կհանգեցնի արտադրական ծախսերի աճին»,- ասաց նա: