«Ոստիկանը, խաբելով, ինձ բրթբրթեց իրենց մեքենայի մեջ»

Քիչ առաջ Բաղրամյան պողոտա եկավ Վարդան Մակինյան ներկայացած մի երիտասարդ,  ով մոտեցավ Երևանի փոխոստիկանապետ Վալերի Օսիպյանին և հայտարարեց, որ ընդամենը րոպեներ առաջ է բաց թողնվել ոստիկանության Կենտրոնի բաժնից: Երիտասարդը նշեց, որ երեկ` մոտավորապես  23:00-ին, իրեն Ազատության հրապարակից խաբելով նստեցրել են ոստիկանական մեքենա և բերման ենթարկել ոստիկանության Կենտրոնի բաժին:  

Օսիպյանը նշեց, որ ինքն այդ դեպքի մասին որևէ տեղեկություն չունի:

Երիտասարդն ասաց  նաև, որ իրեն զրուցելու պատրվակով մոտեցել է ոստիկանության գնդապետ, ով, ինչպես նշեց երիտասարդը, իրեն բրթբրթելով մտցրել է ոստիկանական մեքենան և տարել բաժին: Նա ասաց նաև, որ ոստիկանական մեքենայի մեջ իր գրպանից որոշակի գումար է ընկել, իսկ ոստիկանները թույլ չեն տվել իրեն վերցնել այդ գումարը: Ըստ երիտասարդի՝ ոստիկանները երեկ, իրենից բացի, բերման են ենթարկել ևս հինգ հոգու, սակայն տեղյակ չէ՝ մյուսները բա՞ց են թողնվել, թե՞ ոչ: