ԵՊՀ-ում ուսանողների վարձավճարներն առաջիկա 5 տարիների ընթացքում չեն բարձրանա. պաշտոնական

Առաջիկա 5 տարիների ընթացքում ուսանողների վարձավճարները չեն բարձրանա. այսօր լրագրողներին հայտնեց ԵՊՀ ռեկտոր Արամ Սիմոնյանը:

Նա նշեց նաև, որ այս տարի իրենց ռազմավարական պլանի 5-րդ տարին է լրանում, և իրենք նոր պլան են մշակում, որը պետք է ընդունեն մինչև արձակուրդ գնալը:

«Մեզ սպասվում է ոչ հեշտ աշխատանք. նախատեսում ենք բազմազանացնել մեր կրթական ծառայությունները, հետազոտական համալսարան դառնալու համար պետք է քայլ արվի, պետք է փոխվեն կրթական ծրագրերը` մագիստրատուրայի կրթական ծրագիրը փոխելու լուրջ խնդիր ունենք: Պետք համապատասխան պայմաններ ստեղծենք` խթանելով գիտաշխատողներին, որպեսզի նրանք կարողանան արդյունավետ կերպով իրենց հետազոտությունները կատարել»,- ասաց Սիմոնյանը:

Ըստ նրա` ԵՊՀ-ն շարունակում է մնալ առաջատար դիրքերում, սակայն դա դեռ չի նշանակում, որ իրենք պետք է այդ փառքը վայելեն, քանի որ այդ վարկանիշը շատ արագ կարող է փոխվել: