Իրենց` նախկինում գործած հանցանքները թաքցնելու համար մեղսակից են փնտրում. Դավութօղլուի օգնականը` Օբամային և Պուտինին

Թուրքիայի վարչապետ Ահմեդ Դավութօղլուի օգնական Յալչըն Աքդողանը ԱՄՆ նախագահ Բարաք Օբամայի և ՌԴ նախագահ Վլադիմիր Պուտինի հայտարարությունների կապակցությամբ պատասխան հայտարարությամբ է հանդես եկել:

Ըստ AA-ի` Աքդողանը քննադատել է ԱՄՆ-ի և ՌԴ-ի նախագահներին` ասելով. «Նախ` թող իրենց անցյալին նայեն: Նախկինում իրենց իրագործած կոտորածները թաքցնելու համար մեղսակից են փնտրում»:

Անդրադառնալով Սիրիայում տիրող իրավիճակին` նա ասել է. «Սիրիայում հարյուրհազարավոր մարդ սպանվեց: Երանի Պուտինն այդ մասին հայտարարություն աներ կամ կարողանար դատապարտել Ասադին: Մենք ենք դրանք դատապարտում: Մարդկանց ցավերը կիսողն ու երկու միլիոնին գրկաբաց ընդունողը մենք ենք: Այս ցավերի մասին լռողները անցյալի իրադարձությունների հիման վրա տարբեր հայտարարություններ են անում: Սրանք անընդունելի են: Բոլորս միավորվենք և աշխատենք բարեկամություն հիմնելու համար, այլ ոչ թե անցյալի ցավերն օգտագործենք` թշնամանք հրահրելու համար»: