Պուտինը նախընտրեց Երեւանը. թուրքական կայքերի արձագանքը

Թուրքական գրեթե բոլոր կայքերն անդրադարձել են ՌԴ նախագահ Վլադիմիր Պուտինի՝ ապրիլի 24-ին Երևան այցին:

Մասնավորապես` Haberler կայքն այդ մասին գրել է. «Ռուսաստանը ապրիլի 24-ի հրավերների պատճառով մնացել է Անկարայի և Երևանի արանքում, սակայն ՌԴ նախագահը նախընտրել է Երևանը՝ մասնակցելու, ասյպես կոչված, ցեղասպանության 100-րդ տարելիցի միջոցառումներին»:

Կայքը նշել է նաև, որ «Մոսկվան Չանաքքալեի միջոցառումներին ներկա գտնվելու համար կուղարկի իր 4-րդ քաղաքական դեմքին` խորհրդարանի նախագահ Սերգեյ Նարիշկինին»:

Բացի այդ` նշվում է, որ Պուտինը Երևանում հանդիպում կունենա Ֆրանսիայի նախագահ Ֆրանսուա Օլանդի հետ, ով ևս նույն առիթով կլինի Երևանում: Կողմերը հանդիպման ընթացքում կխոսեն ուկրաինական ճգնաժամի, «Միստրալ» նավերի` Ռուսաստանի հանձնման և երկկողմ հարաբերությունների մասին:

Հիշեցնենք, որ այսօր պաշտոնապես հաստատվեց, որ ՌԴ նախագահ Վլադիմիր Պուտինն Ապրիլի 24-ին կայցելի Երևան: