Գազի հանձնաժողովը հայտարարում է, որ 20 տոկոս բաժնեմասերի օտարումը եղել է օրինական

Այսօր ԱԺ քառօրյայում ներկայացվում է գազի հարցերի ժամանակավոր հանձնաժողովի կատարած աշխատանքը: Հիշեցնենք, որ այդ հանձնաժողովը կազմավորվեց մեկ տարի առաջ, երբ հասարակության մեջ ըմբոստություն բարձրացավ գազի թանկացման կապակցությամբ: Այն պետք է ուսումնասիրեր, թե որքանո՞վ է հիմնավոր գազի թանկացումը, և արդյո՞ք գործընթացում կան անօրինական գործողություններ:

ԱԺ պատգամավոր Խաչատուր Քոքոբելյանը հարց ուղղեց գազի հարցերի ժամանակավոր հանձնաժողովի նախագահ, հիմնական զեկուցող Վարդան Այվազյանին: «Սա շատ խնդրահարույց գործ էր, բայց այդպես էլ հասկանալի չդարձավ` այդքան քրտնաջան աշխատանքներից հետո ի՞նչ խախտում է հայտնաբերվել, եթե եզրակացության մեջ նշված է, որ էական խախտում չի եղել»,- հարցրեց պատգամավորը:

Վարդան Այվազյանը պատասխանեց. «Այն, ինչ նկատի ունեք՝ էական խախտում ասելով, պիտակման խնդիր է երևի: Աղմկահարույցն էլ կապված է նրա հետ, թե ինչ աղմուկ կբարձրացնենք, որովհետև մենք հստակ նշել ենք, որտեղ են արվել խախտումները»: Նրա խոսքով՝ քսան տոկոս բաժնեմասերի օտարում միանշանակ իրականացվել է իրավական կարգավորման դաշտում:

Խաչատուր Քոքոբելյանը արձագանքեց. «Փաստորեն, հանձնաժողովի այսքան աշխատանքներից հետո պարզ է դառնում, որ քսան տոկոս բաժնետոմսերի օտարումը հիմնավոր է, և որ էական խախտում չի՞ հայտնաբերվել»: Վարդան Այվազյանը հաստատեց դա: