Դաշնակցական երիտասարդների ցույցը` ԵՄ պատվիրակության գրասենյակի առջեւ

Այսօր ՀՅԴ Հայաստանի Երիտասարդական և «Նիկոլ Աղբալյան» ուսանողական միությունները Հայոց ցեղասպանության 100-ամյա տարելիցի ծրագրերի շրջանակում Հայաստանում Եվրոպական Միության պատվիրակության գրասենյակի առջև կազմակերպել էին երիտասարդական-ուսանողական ցույց։ Ակցիայի մասնակիցները «Արդարություն», «Ճանաչում» վանկարկումներով ՀՅԴ «Արամ Մանուկյան» կենտրոնից շարժվեցին դեպի ԵՄ պատվիրակության գրասենյակ: Նրանք կրում էին «Աշխարհը ճանաչում է, Թուրքիան ճանաչելու է», «Armenian history not for sale» գրությամբ պաստառներ:

Դաշնակցական երիտասարդները հայտարարեցին, որ ցեղասպան Թուրքիան չի կարող անդամակցել ԵՄ-ին: «Որպես հայ երիտասարդներ` ողջունում և աջակցում ենք Եվրոպական խորհրդարանի վերջին կոչը Եվրամիության անդամ երկրներին` ճանաչել Հայոց ցեղասպանությունը»,- նշեցին ակցիայի կազմակերպիչները:

Նրանք ԵՄ պատվիրակության ներկայացուցչին հանձնեցին պահանջագիր, որի բովանդակությանը կարող եք ծանոթանալ այստեղ:

Նշենք, որ այսօր նմանատիպ ցույցեր տեղի կունենան աշխարհի տարբեր երկրներում գտնվող` Եվրոպական Միության գրասենյակների առջև:

Մանրամասները` yerkir.am-ի տեսանյութում: