Էրդողանի պատիվը պահելու համար պահանջում են Թուրքիայի փոխվարչապետի հրաժարականը

Անկարայի քաղաքապետ Մելիք Գյոքչեքը Twitter-յան իր էջում պահանջել է փոխվարչապետ Բյուլենթ Արընչի հրաժարականը:

Ըստ Internethabe-ի՝ պատճառը Արընչի՝ նախօրեին արած հայտարարությունն էր, թե երկրի նախագահը տեղյակ չէ քրդական հարցի լուծման մանրամասներից, այդ իսկ պատճառով լավ կլինի այդ մասին ելույթ չունենա:

Արընչի այդ հայտարարությունը պատճառ է դարձել, որ երկրում իշխող կուսակցության մի շարք անդամներ նրան մեղադրեն Գյուլենի շարժման հետ սերտ կապեր ունենալու մեջ:

Գյոքչեքը, պահանջելով Արընչի հրաժարականը, միկրոբլոգում գրել է. «Արը'նչ, այլևս քեզ չենք ուզում»: Ի պատասխան, Արընչն ասել է. «Նա իմ հրաժարականը պահանջելու չափ պատվավոր մարդ չէ»:

Հիշեցնենք, որ օրեր առաջ Էրդողանն իր ելույթում ասել էր, որ չկա քրդական հարց, ինչը մեծ զայրույթ էր առաջացրել շատերի, հատկապես՝ քրդամետ Ժողովուրդների դեմոկրատական կուսակցության անդամների շրջանում: