Ձյուդոյի ֆեդերացիան ուժեղագույն կազմով կմասնակցի Բաքվի Եվրոպական խաղերին

ՀԱՕԿ-ը որոշում է կայացրել մասնակցել Բաքվի Եվրոպական խաղերին: Այս առիթով  Yerkir.am-ը զրուցեց Հայաստանի ձյուդոյի ֆեդերացիայի փոխնախագահ և գլխավոր քարտուղար Դավիթ Խիթարյանի հետ:

«Ձյուդոյի Եվրոպայի առաջնությունը ներառված է Բաքվի Եվրոպական խաղերում, որն էլ վարկանիշային է օլիմպիական խաղերի համար: Եթե խնդիրներ չլինեն մարզիների և նրանց ծնողների հետ,  ապա մասնակցելու ենք ուժեղագույն կազմով: Հիմա մեր հավաքականը ուսումնամարզական հավաքի է Չեխիայում, այնուհետև Թբիլիսիի վարկանիշային «Գրան պրին» է, որից հետո կորոշենք մասնակիցների վերջնական կազմն ու թիվը»,- ասաց նա:

Խոսելով ադրբեջանակն կողմի տված անվտանգության երաշխիքների մասին` Խիթարյանը նշեց. «Բնական է, որ ճնշում կլինի մեր մարզիկների վրա, բայց չեմ կարծում, որ անվտանգության հետ կապված խնդիրներ լինեն: Սահմանին նույնպես ճնշումը շատ մեծ է, ուրեմն չպաշտպանե՞նք հայրենիքը: Եթե ընդհանուր որոշում կա, որ պետք է մասնակցենք այդ խաղերին, ուրեմն ամեն ինչ պետք է անենք, որ թասիբով մասնակցենք»: