Թեման փակենք արդեն. Հովիկ Աբրահամյանը՝ Հրայր Թովմասյանին

Կառավարության այսօրվա նիստում որոշում կայացվեց ստեղծել կոռուպցիայի դեմ պայքարի խորհուրդ: Ըստ կառավարության ներկայացրած նախագծի` խորհրդի կազմում պետք է ընդգրկված լինեն նաև ընդդիմադիր խմբակցությունների պատգամավորներ:

Նախագիծը ներկայացնող` արդարադատության նախարար Հովհաննես Մանուկյանը նշեց, որ կառավարությունը գրավոր նամակ է ուղարկելու ԱԺ նախագահին, որպեսզի նա էլ դիմի ընդդիմադիր խմբակցությունների պատգամավորներին` կոռուպցիայի դեմ պայքարի խորհրդում անդամ ներկայացնելու համար:

ԱԺ աշխատակազմի ղեկավար Հրայր Թովմասյանը նախագծի ներկայացման ժամանակ խոսք խնդրեց և նշեց, որ եթե ընդդիմադիր խմբակցությունների պատգամավորները պետք է ընդգրկվեն խորհրդում, ավելի ճիշտ կլինի, որ կառավարությունը ոչ թե ԱԺ նախագահին դիմի, այլ հենց ընդդիմադիր խմբակցություններին:

Հովհաննես Մանուկյանը պնդեց, որ ինքն այլ կարծիքի է և նախագծում ներկայացված տարբերակն ավելի ճիշտ է:

Հովիկ Աբրահամյանը նույնպես նշեց. «Ես էլ գտնում եմ, որ մենք ճիշտ ենք, որ պետք է դիմել ԱԺ նախագահին: Եվ, պարո'ն Թովմասյան, թեման փակեք արդեն»: