Մշակույթը կույրաղիք չէ, որին պարզապես պետք է մի քիչ հանգստացնել, որ չցավի. Ռուբեն Բաբայան

Երեխաները զրկված են մշակութային կրթությունից, այն մեզ մոտ չի կարևորվում. լրագրողների հետ հանդիպման ժամանակ հայտարարեց Հովհ. Թումանյանի տիկնիկային թատրոնի տնօրեն Ռուբեն Բաբայանը:

Ըստ նրա` ամեն ինչ թողնվում է ծնողների կամքին, որը մեծ մասամբ չի համընկնում երեխայի` ազատ ընտրության իրավունքի իրացման հետ: Այն հարցում, որ ծնողներն ազատ են` երեխային կտանե՞ն թատրոն կամ ցուցահանդես, թե՞ ոչ, մեծ մասամբ տուժում են երեխաները:

«Եթե հայրը 5 տոմսի փոխարեն գերադասում է մեկ շիշ օղի գնել, դա չստացվեց երեխայի ազատ իրավունքն ապահովել: Երբ մենք մեր երեխային կերակուր ենք տալիս, չենք թողնում նրա ազատ ընտրությանը` նրա առողջական վիճակի մասին հոգալով, իսկ այդ դեպքում նրա հոգևոր սնունդի մասին ո՞վ պետք է հոգա»,- ասում է Բաբայանը: