Երիտասարդին ազատ կարձակեն. բողոքի ակցիան չեղյալ հայտարարվեց

Շիրակի մարզի դատախազ Րաֆֆի Ասլանյանն այսօր ցուցում է տվել նախաքննական մարմնին` ազատ արձակել հունվարի 15-ին Գյումրիում կայացած բողոքի ցույցերի մասնակիցներից` Սառնաղբյուր գյուղի բնակիչ Մնացական Ալեքսանյանին և նրա նկատմամբ խափանման միջոց ընտրել չհեռանալու մասին ստորագրությունը: Այս մասին yerkir.am-ի հետ զրույցում հայտնեց դատախազ Ասլանյանը` նշելով, որ այս պահին քննիչները շարունակում են քննչական գործողությունները և հնարավոր է` արդեն կատարել են ցուցումը:

Նշենք, որ այսօր Ալեքսանյանի ձերբակալման դեմ բողոքի ակցիաներ էին նախատեսված Գյումրիում և Երևանում: Հայտնի դարձավ, որ  Գյումրիում նախատեսված բողոքի ավտոերթը չեղյալ է հայտարարվում: Այժմ Ախուրյանի ՁՊՎ-ի մոտ են հավաքվել Մնացական Ալեքսանյանի հարազատներն ու ընկերները և սպասում են նրա ազատ արձակմանը: