Գևորգ Կոստանյանը հեռացավ, երբ ցուցարարներից մեկը քար նետեց

Գյումրիում ցուցարարների մոտից հեռացավ ՀՀ գլխավոր դատախազ Գևորգ Կոստանյանը: Մինչ այդ «Ասպարեզ» ակումբ» ՀԿ-ի նախագահ Լևոն Բարսեղյանը առաջարկում էր նրան գրություն ուղարկել Ռուսաստանի գլխավոր դատախազին, որ ոճրագործի գործը փոխանցեն Հայաստանին: Այդ պահին ցուցարարներից մեկը քար նետեց, և գլխավոր դատախազը հեռացավ: Լևոն Բարսեղյանը հանդիմանեց ցուցարարներին` ասելով. «Եկել եք քարով զարկելո՞ւ»:

Ցուցարարներին մոտեցավ Շիրակի թեմի առաջնորդ Միքայել եպիսկոպոս Աջապահյանը: «Այդ ճիվաղը պետք է դատվի Հայաստանում և Հայաստանի օրենքներով: Այդ պահանջը պետք է կատարի ռուսական կողմը: Պահանջի օբյեկտը այստեղ չէ: Քաղաքակիրթ ձևով, այլ ոչ թե միմյանց վրա քար շպրտելով, պետք է իրականացնենք այդ պահանջը»,- ասաց նա:

Նշենք, որ ցուցարարները պահանջում են գլխավոր դատախազ Գևորգ Կոստանյանի հրաժարականը: