Թուրքիան ապրիլի 24-ին մեծ շուքով նշելու է Չանաքքալեի ճակատամարտի 100-ամյակը

Թուրքիան ապրիլի 24-ին պատրաստվում է մեծ շուքով նշել Չանաքքալեի ճակատամարտի 100-ամյակը (թեեւ այն տեղի է ունեցել մարտի 18-ին): Այսօր այդ մասին Թուրքիայում այցով գտնվող` Ադրբեջանի նախագահ Իլհամ Ալիեւի հետ համատեղ մամուլի ասուլիսի ժամանակ հայտարարել է Թուրքիայի նախագահ Ռեջեփ Թայիթ Էրդողանը. տեղեկացնում է ադրբեջանական «Թրենդ» գործակալությունը:

Ըստ Էրդողանի` այդ օրը Թուրքիա կհրավիրվեն բազմաթիվ պետությունների ղեկավարներ:

Ի դեպ, ադրբեջանական haqqin az կայքն այդ լուրը վերնագրել է «Հայոց ցեղասպանության փոխարեն Թուրքիան տոնում է Չանաքքալեի մոտ հաղթանակը»:

Չանաքքալեի ճակատամարտը տեղի է ունեցել 1915թ. մարտի 18-ին: Այդ օրը թուրքերը դուրս են մղել Անտանտի երկրների նավերը, որոնք փորձում էին մտնել Չանաքքալե (Դարդանել):