«Նույնիսկ ելույթ ունենալ չես ուզում, չէ՞»

Արդեն հայտնել ենք, որ երեկ Մոսկվայում կայացել  է Եվրասիական տնտեսական բարձրագույն խորհրդի նիստը, որի ավարտից հետո միության անդամ երկրների ղեկավարները հանդես են եկել մամուլի ասուլիսով: 

Բելառուսի նախագահ Ալեքսանդր Լուկաշենկոն բավական զգացմունքային ելույթ է ունեցել՝ անդրադառնալով Ռուսաստանի և Բելառուսի միջև վերջին օրերին առաջացած տարաձայնություններին: Նա խորհուրդ է տվել ԶԼՄ-ներին` շատ «չտառապել» այդ հարցով, քանի որ իրենք Վլադիմիր Պուտինի հետ քննարկել են Բելառուսի և Ռուսաստանի միջև առկա խնդիրները, և դրանք այնքան էլ բարդ չէ լուծել:

Լուկաշենկոյի ելույթից հետո Հայաստանի նախագահ Սերժ Սարգսյանը կատակել է, թե նրա այդքան վառ ելույթից հետո իրեն մնում է միայն շնորհակալություն հայտնել ԵՏՄ անդամ երկրների ղեկավարներին: Իսկ Լուկաշենկոն,  Սարգսյանի կատակին ի պատասխան, ասել է. «Նույնիսկ ելույթ ունենալ չես ուզում, չէ՞»:

Նշենք, որ Սերժ Սարգսյանի խոսքը բավական կարճ է եղել: Նա շնորհակալություն է հայտնել Եվրասիական տնտեսական միության անդամ պետությունների ղեկավարներին Եվրասիական տնտեսական միությանը Հայաստանի միանալու հարցում աջակցության համար, նաև նշել է այդ երկրների համապատասխան նախարարությունների, գերատեսչությունների, Եվրասիական տնտեսական հանձնաժողովի կատարած մեծ աշխատանքը և բոլորին մաղթել հաջողություններ հետագա գործունեության մեջ: