Պուտինը «սպանեց» դեպի Հայաստան երկաթուղու գաղափարը

Վրաստանում դարձյալ խոսեցին վրացական երկաթգծի աբխազիական հատվածի վերականգնման հնարավորության մասին: Սակայն այս անգամ առիթը տվեց ՌԴ նախագահ Վլադիմիր Պուտինը. գրում է Новости Грузия-ն:

«Ռուսաստանի և Աբխազիայի միջև կնքված` համագործակցության վերաբերյալ համաձայնագիրը, ամենայն հավանականությամբ, փոխել է ոչ միայն պաշտոնական Թբիլիսիի տրամադրություններրը,  այլև պլանները: Վրաստանի նոր կառավարությունը ընտրվելուց գրեթե անմիջապես հետո հայտարարեց, որ ոչ մի վատ բան չի տեսնում Սուխումի և Թբիլիսիի միջև հաղորդակցության վերականգնման մեջ: Սակայն վերոհիշյալ պայմանագրի կնքումից հետո, որը Թբիլիսին անեքսիայի փորձ է համարում, այդ հարցը դժվար թե լուծում ստանա: Թբիլիսի դժգությունն առաջացրել է նաև այն, որ Պուտինը խոստացել է մտածել երկաթուղու վերականգնման մասին»,- գրում է պարբերականը:

Վրաստանի քաղաքացիական իրավահավասարության և հաշտեցման հարցերով նախարար Պաատա Զաքարեիշվիլին կարծում է, որ Պուտինի այդ խոսքերից հետո նախագիծը չի իրագործվի: «Հենց Պուտինն ասաց, որ երկաթուղին կբացեն Ռուսաստանի և Աբխազիայի նախաձեռնությամբ, ոչնչացրեց այդ գաղափարը: Քանի դեռ օկուպացված Աբխազիան համարվում է այդ նախագծի նախաձեռնողը, երկաթուղին չի աշխատի»,- ասել է նա: