Որքան է նախկին փոխվարչապետի ունեցվածքը. «ՀԺ»

«Հայկական ժամանակ» թերթը գրում է. «IDeA հիմնադրամի նոր ղեկավար, նախկին փոխվարչապետ, ՏԿ նախկին նախարար Արմեն Գեւորգյանը Բարձրաստիճան պաշտոնատար անձանց էթիկայի հանձնաժողովին է ներկայացրել պաշտոնը դադարեցնելու հայտարարագիրը, ըստ որի՝ վերջին 4 տարիների ընթացքում նրա կարողությունը գրեթե փոփոխության չի ենթարկվել:

Ըստ այդմ՝ Գեւորգյանի ունեցած դրամական միջոցները կազմում են 12 հազար դոլար եւ 1,5 մլն դրամ: 2014-ին Գեւորգյանն ունեցել է 3 մլն դրամ եկամուտ՝ ստացված աշխատավարձից, ինչպես նաեւ 26 հազար 750 դոլար եկամուտ է ստացել վարձակալության դիմաց: Վարձակալության դիմաց ստացված եկամուտ Գեւորգյանը հայտարարագրել է վերջին 4 տարիներին անընդմեջ:

Գեւորգյանն ունի բնակարան Ս. Պետերբուրգում, Երեւանում, իսկ Կոտայքի Քարաշամբ գյուղում՝ 2 հողամաս: Նա հայտարարագրել է նաեւ 1 ավտոտնակ, որը ձեռք է բերել վերջին 2 տարիների ընթացքում:

Մեր նախորդ հրապարակումներից մեկում անդրադարձել ենք նաեւ Արմեն Գեւորգյանի կնոջ՝  Թամարա Գեւորգյանի ունեցվածքին: Ըստ պաշտոնական փաստաթղթերի՝  կինն ամուսնուն գերազանցում է իր հարստությամբ: Լինելով ակնաբույժ եւ ստանալով տարեկան 1,4 մլն դրամ աշխատավարձ՝ նա հայտարարգրել է 250 հազար դոլարի չափով դրամական միջոցներ: Տիկինը տոկոսով փող է տալիս, օրինակ՝ 2013 թ. նա 8,1 մլն դրամ եկամուտ է ստացել փոխառության տված գումարի տոկոսներից»:

Մանրամասն՝ թերթի այսօրվա համարում: