Նիկոլ Փաշինյանը, որպես իր խոսքերի ապացույց, միացրեց կառավարության նիստի ձայնագրությունը

ԱԺ նիստում կառավարության հետ հարցուպատասխանի ժամանակ ԱԺ պատգամավոր Նիկոլ Փաշինյանը հարց ուղղեց կառավարությանը, թե ինչպե՞ս է տեղի ունեցել Սյունիքի մարզպետի պաշտոնում Սուրիկ Խաչատրյանի վերանշանակումը: Նա վկայակոչեց Սահմանադրության համապատասխան հոդվածը` կասկածներ հայտնելով, որ Սուրիկ Խաչատրյանի վերանշանակումը օրենքի համաձայն է եղել:

ՀՀ կառավարության աշխատակազմի ղեկավար նախարար Դավիթ Հարությունյանը պատասխանեց, որ դա եղել է սահմանված կարգի համաձայն` քվեարկությամբ:

Նրա պատասխանից հետո Նիկոլ Փաշինյանը միացրեց կառավարության նիստի այն ձայնագրությունը, որը վկայում էր, որ ոչ մի քվեարկություն էլ չի եղել, վարչապետը հարցրել է. «Հարցեր կա՞ն, եթե չկան, ուրեմն հաստատում ենք»:

Նշենք, որ Նիկոլ Փաշինյանի` ձայնագրություն միացնելը բացարձակապես դուր չեկավ ԱԺ նախագահ Գալուստ Սահակյանին: Նա հայտարարեց. «Որպեսզի սա նախադեպ չդառնա, մյուս անգամ, երբ հեռախոսով ձայնագրություն միացնի որևէ մեկը, կհանձնարարեմ անջատել խոսափողը»:

Մանրամասները` տեսանյութում: