22-ամյա հղի կինը ծանրամարտով է զբաղվում (ֆոտոշարք)

Ավստրալիայում 22-ամյա Բրիթանի Հորը, որ հղիության 33-րդ շաբաթում է, զբաղվում է ծանրամարտով:

Daily Mail-ի հաղորդմամբ` Հորն օրական մարզվում է 30-40 րոպե: Նրա զուգընկերն ու մեկ տարեկան որդին հետևում են, որպեսզի մարզումներն ապահով անցնեն։

Բրիթանին հայտնել է, որ 16 տարեկանից զբաղվում է ծանրամարտով և որոշել է, որ մայրանալը չի կարող խանգարել իրեն զբաղվել սիրելի մարզաձևով ։

«Նրանք, ովքեր լսում են իմ այս որոշման մասին, ասում են, որ այն կարող է վնասել երեխային: Ես նրանց հորդորում եմ մինչև քննադատելը ուսումնասիրել»,- ասել է Բրիթանին:

Ըստ Բրիթանիի մարզիչ Քեյսի Ուայթնի` հղիության ընթացքում ծանրամարտով զբաղվելը կապված է անձի` մինչ այդ արած մարզումների հետ:

«Բրիթանին վաղուց է զբաղվում սպորտով, նա կարող է իրեն թույլ տալ հղիության ընթացքում շարունակել մարզումները, սակայն նախկինում ծանրամարտով չզբաղվածների համար նման որոշումը կարող է վնասակար լինել։ Պետք է ասել, որ մարզումները հղիության ընթացքում շատ կարևոր են: Այն կարող է օգնել կնոջը հղիությունից հետո հեշտությամբ վերականգնել մարմինը»,- ասել է մարզիչը: