Եռյակի ճանապարհային քարտեզն ու շտաբների ձևավորումը «միս ու արյուն» է ստացել

Ավարտվել է ԲՀԿ քաղխորհրդի նիստը:  ԲՀԿ մամուլի խոսնակ Տիգրան Ուրիխանյանը լրագրողների հետ զրույցում նշեց. «ԲՀԿ-ի քաղաքական խորհուրդն այսօր կայացրեց որոշում, ըստ որի` կուսակցության տարածքային գրասենյակները տրամադրվելու են համաժողովրդական շարժմանը, ինչպես նաև ստեղծվում են նոր գրասենյակներ այն վայրերում, որտեղ մարդկանց ներգրավելու անհրաժեշտություն, նաև քաղաքացիների ցանկություն կա: Ոչ իշխանական մյուս քաղաքական ուժերի մեր գործընկերների, քաղաքացիական հասարակության ներկայացուցիչների հետ խորհրդակցություններ են իրականացվելու»:

Ուրիխանյանի խոսքով` առանձնացվել են խմբեր, որոնք այդ աշխատանքները պետք է կատարեն, պատասխանատուները երկշաբաթյա ժամկետից հետո  պետք է զեկուցեն կուսակցության ղեկավարին և խորհրդին իրենց իրականացրած աշխատանքների մասին:

Աշխատանքներ են իրականացվելու Սփյուռքի կառույցների հետ, ստեղծվելու են քաղաքացիների իրավական աջակցության կենտրոն, համապատասխան ենթակառուցվածքներով,  միասնական ինֆորմացիոն համակարգ:

 «Այսօր ճանապարհային քարտեզը ստացավ «միս ու արյուն», մշակվեց ոչ միայն գործողությունների պլանը, այլ նաև հստակ ժամկետը: Երկու շաբաթ անց մենք կունենանք ամփոփ տեղեկատվություն»,- ասաց  Տիգրան Ուրիխանյանը: