Ավետարանչական եկեղեցու հովիվները սկսել են այցելել տներ և մանուկներին քարոզել

Ոչ ոք չի պատկերացնում, թե գյուղերում աղանդներն ինչ արագությամբ են տարածվում ու իրենց ճյուղերը հիմնում. այսօր լրագրողների հետ հանդիպման ժամանակ հայտարարեց Միացյալ երիտասարդական լիգայի համանախագահ Դանիել Պետրոսյանը: Ըստ նրա` ՄԵԼ-ը վերջին շրջանում ուսումնասիրություններ է կատարել մարզերում և պարզել` գյուղ չկա, որտեղ քայքայիչ որևէ աղանդ չլինի:

«Ցավն այն է, որ գյուղերում մարդիկ չեն էլ գիտակցում, թե ուր է տանում այդ ամենը: Շատերն այս կամ այն աղանդի հավաքներին են գնում` չպատկերացնելով, որ դա աղանդ է»,- ասաց Պետրոսյանը:

Նա նաև տեղեկացրեց, որ գյուղերում վերջերս ակտիվացել է նաև Ավետարանչական եկեղեցին. այդ եկեղեցու հովիվները սկսել են այցելել տներ, որպեսզի երեխաներին քարոզեն:

«Հենց մեր` Մասիսի Դարակերտ գյուղում ես ինքս եմ ականատես եղել, թե ինչպես է հովիվն այցելել այս կամ այն տուն, որ երեխաներին քարոզի, ինչն օրենքով արգելված է: Բացի դրանից` ավետարանչականները սկսել են ավելի հաճախ հավաքներ կազմակերպել, որին նույնպես մի շարք անչափահասներ են մասնակցում»,- ասաց Պետրոսյանը: