Ինչի՞ց է կախված Ծառուկյանի մասնակցությունը հոկտեմբերի 10-ի հանրահավաքին

Ոչ իշխանական երեք ուժերի կազմակերպած` հոկտեմբերի 10-ի հանրահավաքին «Ժառանգության» կուսակցության նախագահ Րաֆֆի Հովհաննիսյանի մասնակցության կապկացությամբ խնդիրներ չկան, սակայն դա հստակ կորոշվի հոկտեմբերի 9-ին: Այս մասին Yerkir.am-ի հետ զրույցում ասաց «Ժառանգություն» կուսակցության փոխնախագահ Արմեն Մարտիրոսյանը:

Գագիկ Ծառուկյանի մամուլի խոսնակ Իվետա Տոնոյանն էլ նշեց, որ այս պահին դեռևս որոշում չկա ԲՀԿ նախագահ Գագիկ Ծառուկյանի մասնակցության վերաբերյալ:

Ինչ վերաբերում է ՀԱԿ ղեկավար Լեւոն Տեր-Պետրոսյնաի մասնակցությանը, ապա դա չհաջողվեց ճշտել, քանի որ ՀԱԿ մամուլի խոսնակ Արման Մուսինյանը, ինչպես միշտ, չպատասխանեց հեռախոսազանգերին:

Ուշագրավ է, որ օրեր առաջ լրագրողների հետ զրույցում ԲՀԿ-ական Ստեփան Մարգարյանը հայտարարել էր. «Այն, որ լիդերները լինելու են հանրահավաքին, միանշանակ է: Մենք այս պահին քննարկում ենք, թե առաջնորդները որ պահին են միանալու հանրահավաքին»:

Մեր տեղեկություններով` հանրահավաքին «որ պահին միանալ»-ը կախված է հանրահավաքին եկած մարդկանց թվից: Գագիկ Ծառուկյանի պատկերացրած «շատ»-ի դեպքում նա  այդ օրը հարթակ կբարձրանա, Ծառուկյանի մասնակցության դեպքում` Տեր-Պետրոսյանը եւ Հովհաննիսյանը եւս: