«Հայերի իրագործած ցեղասպանությունը». Թուրքիան և Ադրբեջանը համատեղ մրցույթ են հայտարարել՝ ընդդեմ հայերի

Հայոց ցեղասպանության 100-ամյա տարելիցին ընդառաջ՝ Թուրքիան և Ադրբեջանը շարունակում են համատեղ պայքարել Ցեղասպանության ճանաչման դեմ՝ հերթական անգամ հերքելով և կեղծելով պատմությունը:

Թուրքիայում Գազի համալսարանն ու Ադրբեջանի դեսպանատունը համատեղ մրցույթ են կազմակերպել՝ «Երբ բոլորը քնած էին. Անատոլուից Կովկաս՝ հայերի իրագործած հալածանքները» վերնագրով:

Ըստ Haber.sol-ի՝ մրցույթի նպատակն է «արթնացնել հայերի կողմից թուրքերի դեմ իրագործված ցեղասպանության նկատմամբ անտարբեր մնացած աշխարհին»:

Մրցույթի հայտարարությունը տեղ է գտել համալսարանի պաշտոնական կայքէջում, որում պնդել են, որ 1915 թվականի «տեղահանությունն» արվել է «պետության անվտանգության» համար, ավելին՝  հայերի համար «հատուկ» նախատեսված վայրերում: Հայտարարության մեջ անդրադարձ կա նաև Լեռնային Ղարաբաղին՝ այն հերթական անգամ ներկայացնելով որպես ադրբեջանական տարածք:

Մրցույթի ամենաապշեցուցիչ մասն այն է, որ արդյունքները կհայտնեն Հրանտ Դինքի սպանության օրը՝ հունվարի 19-ին: Թե ի՞նչ նպատակով են ընտրել այդ օրը, մնում է անպատասխան: