ՀՀ-ից մեկնողների թիվը դարձյալ աճել է

Հայաստան ժամանողների թիվն ավելացել է, Հայաստանից մեկնողներինը` ցավոք, նույնպես:

ՀՀ Ազգային վիճակագրական ծառայության մարդահամարի և ժողովրդագրության բաժնի պետ Կարինե Կույումջյանը լրագրողների հետ հանդիպման ժամանակ տեղեկացրեց, որ 2014-ի առաջին կիսամյակում Հայաստան ժամանողների թիվը կազմել է 1 067 000, որը, 2013-ի նույն ժամանակահատվածի համեմատ, 145 000-ով ավելի է:

Ընթացիկ տարվա առաջին կիսամյակում Հայաստանից մեկնողների թիվը 1 078 200-ն է, որը 62 000-ով ավելի է, քան նախորդ տարվա առաջին կիսամյակում:

«Հայաստան ժամանածների թիվը 2008-2013 թթ. աճ է արձանագրել, սակայն, դրան զուգահեռ, մեկնումների ծավալը մոտ 1 մլն 100 հազարով ավելացել է: Ստացվում է` մեկնումները գերազանցել են ժամանումները: Արտաքին միգրացիան հիմնականում եղել է և շարունակում է լինել դեպի Ռուսաստան: Ըստ ՄԱԿ-ի տվյալների` արտաքին միգրանտների թիվը վերջին չորս տարվա ընթացքում կազմել է 115 000 մարդ»,- ասաց Կույումջյանը: