Որքա՞ն գումար է գոյացել տեսախցիկների և արագաչափերի արձանագրած խախտումների տուգանքներից

Հայաստանում տեսախցիկների և արագաչափերի արձանագրած խախտումների տուգանքներից գոյացած գումարը կազմել է գրեթե 3 մլրդ դրամ: Այս մասին այսօր լրագրողների հետ զրույցում հայտնեց ՀՀ ճանապարհային ոստիկանության պետի տեղակալ Արմեն Խաչատրյանը:

Նշենք, որ ներկայումս ՀՀ-ում գործում է 171 արագաչափ սարք, իսկ Երևանում տեսախցիկներով վերահսկվում է 90 խաչմերուկ:

Խաչատրյանի խոսքով` 2014թ. սեպտեմբերի 3-ի դրությամբ ՀՀ-ում հաշվառվել է զոհերով և վիրավորներով 2020 ճանապարհատրանսպորտային պատահար, որի հետևանքով զոհվել է 192 մարդ, վիրավորվել՝ 2913-ը: Նախորդ տարվա նույն ժամանակահատվածի համեմատությամբ` ՃՏՊ-ների քանակն ավելացել է 221-ով, վիրավորներինը՝ 346-ով, զոհերի թիվը նվազել է 20-ով:

Խաչատրյանը նաև ասաց, որ, բացի վարորդների բողոքներից, ներքին վերահսկողության արդյունքում վերջին 3 ամսում 1000-ից ավելի վարչական ակտ է բեկանվել: Նա կոչ արեց քաղաքացիներին` վարչական ակտերի իրավաչափության հետ կապված հարցեր ունենալու դեպքում դիմել ճանապարհային ոստիկանություն: Ըստ նրա` դա հարցին լուծում տալու ամենակարճ ճանապարհն է :