Սերժ Սարգսյանի երդման արարողությանն էլ Վրաստանում Թուրքիայի դեսպանն էր ներկա…Շավարշ Քոչարյան

Թուրքիայի նորընտիր նախագահի երդման արարողությանը ՀՀ արտգործնախարար Էդվարդ Նալբանդյանի մասնակցությունը պայմանավորված է նախագահի ընտրություն փաստով: Այսօր լրագրողների հետ հանդիպման ժամանակ նման հայտարարություն արեց ՀՀ փոխարտգործնախարար Շավարշ Քոչարյանը:

Թե ի՞նչ կտա Հայաստանին այդ մասնակցությունը, Շավարշ Քոչարյանն, ըստ էության, հստակ պատասխաններ չտվեց:

Քոչարյանն ընդգծեց, որ Թուրքիայում ինաուգուրացիա նախկինում երբեք չի եղել, որովհետեւ մինչ այդ Թուրքիայի նախագահն ընտրվում էր խորհրդարանի կողմից, առաջին անգամ է, որ ուղղակի ընտրություն է կատարվել, հետեւաբար` սա առաջին անգամ է, որ հարեւան երկրում տեղի է ունենում այդ արարողությունը:

ՀՀ փոխարտգործնախարարը նշեց, որ Սերժ Սարգսյանի երդման արարողությանն էլ Թուրքիան է մասնակցել' Վրաստանում Թուրքիայի դեսպանի մակարդակով:

Երբ լրագրողները հետաքրքրվեցին, թե ի՞նչ լուրեր կան հայ-թուրքական սահմանի բացումից, Շավարշ Քոչարյանը հակիրճ պատասխանեց. «Լուրեր չկան»:

Նա լրագրողների հետ զրույցում անդրադարձավ նաեւ ԱՄՆ Կալիֆոռնիա նահանգի սենատի կողմից ԼՂՀ անկախության ճանաչման փաստին' նշելով, որե դա չափազանց կարեւոր է, որովհետեւ նմանատիպ բանաձեւերի ընդունումով սկսվում է Արցախի խնդրի լուծումը: