Լևոն Մանասերյանը մասնակցել է «Մոցարտեում» միջազգային ամառային ակադեմիայի վարպետության դասերին

Հայտնի դաշնակահար Ջոզեֆ Պարատորեի հրավերով՝ դաշնակահար Լևոն Մանասերյանը (պրոֆեսոր Սերգեյ Սարաջյանի դասարան) Ավստրիայի Զալցբուրգ քաղաքում մասնակցել է «Մոցարտեում» միջազգային ամառային ակադեմիայում կազմակերպված վարպետության դասերին: Վարպետության դասերի շրջանակում երիտասարդ դաշնակահարը Պարատորեի դասարանական համերգին կատարել է Բախի ռե մինոր «Խրոմատիկ ֆանտազիան և ֆուգան»:

Ուշագրավ է այն փաստը, որ վարպետության դասերի եզրափակիչ համերգին՝ Ջոզեֆ Պարատորեի տասնմեկ հոգանոց դասարանը /բազմազգ/ ներկայացրել է Հայաստանի պատվիրակը՝ կատարելով Արամ Խաչատրյանի «Տոկատը»: Վարպետության դասերին ակտիվ մասնակցության համար Լևոն Մանասերյանին շնորհվել է դիպլոմ:

Լևոն Մանասերյանը Երևանի Կոմիտասի անվան պետական կոնսերվատորիայի մագիստրատուրայի 2-րդ կուրսի ուսանող է, մի շարք միջազգային և հանրապետական մրցույթների դափնեկիր և մեդալակիր:

Վերջերս նա մենահամերգներով հանդես է եկել Բրյուսելում՝ կատարելով Բախի, Բեթհովենի, Խաչատրյանի, Սարաջևի ստեղծագործությունները: Համերգի ընթացքում կատարել է նաև սփյուռքահայ կոմպոզիտոր Հ. Բոյաջյանի «Հայկական երգը» դաշնամուրային պիեսը, որն առաջին անգամ էր հնչում Եվրոպայում: Համերգները ջերմորեն են ընդունվել օտարազգի ունկնդրի և տեղի հայ համայնքի ներկայացուցիչների կողմից: