Նիկոլաևկան ամբողջությամբ մեր վերահսկողության տակ է, գերի է վերցվել 50 աշխարհազորային. Ավակով

Ուկրաինայի բանակայինները 50 աշխարհազորայինի են գերի վերցրել Սվալյանսկի արևելքում գտնվող Նիկոլաևկա ավանում: Այս մասին տեղեկացնում է lenta.ru-ն` նշելով, որ նման հայտարարություն է արել Ուկրաինայի ներքին գործերի նախարար Արսեն Ավակովը ֆեյսբուքյան իր էջում:

«Նիկոլաևկան ամբողջությամբ մեր վերահսկողության տակ է: Բռնվել է մոտ 50 զինյալ, ովքեր վայր են դրել զենքը»,- գրել է Ավակովը:

Նա նաև հավաստիացրել է, թե մշակույթի կենտրոնի նկուղում գտել են 150 կնոջ և երեխայի, ովքեր թաքնվում էին աշխարհազորայիններից: Ավակովի տվյալներով` ուկրաինացի զինծառայողները կորուստներ չեն կրել Նիկոլաևկայում մարտական գործողությունների ժամանակ:

Ինքնահռչակ «Դոնեցկի Ժողովրդական Հանրապետության» վարչապետ Ալեքսանդր Բորոդայը, սակայն, հերքել է աշխարհազորայինների գերվելու մասին տեղեկությունները: