Իսրայելի ԱԳՆ պատվիրակությունն այցելել է Ծիծեռնակաբերդ

Այսօր Երևաննում Հայաստանի և Իսրայելի արտաքին գործերի նախարարությունների միջև կայացան դիվանագիտական և քաղաքական խորհրդատվություններ:

Հայկական կողմից պատվիրակությունը գլխավորում էր ՀՀ ԱԳ նախարարի տեղակալ Սերգեյ Մանասարյանը, իսրայելական կողմից` Իսրայելի ԱԳ նախարարության գլխավոր տնօրենի տեղակալ, Եվրասիայի բաժնի պետ, դեսպան Աննա Ազարին:

Խորհրդատվությունների ընթացքում քննարկվեցին հայ-իսրայելական հարաբերությունների օրակարգի հարցեր, որոնք վերաբերում էին քաղաքական, տնտեսական և հումանիտար ոլորտներում երկկողմ փոխշահավետ կապերի հետագա զարգացմանն ու խորացմանը:

Անդրադարձ կատարվեց փոխադարձ ներդրումների խրախուսմանը: Կարևորվեց փոխգործակցությունը միջազգային կազմակերպությունների շրջանակներում:

Իսրայելի ԱԳՆ պատվիրակությունը այցելեց նաև Մեծ եղեռնի զոհերի հուշահամալիր, եղավ Հայոց ցեղասպանության թանգարան-ինստիտուտում, ծաղիկներ դրեց Ցեղասպանության զոհերի հիշատակը հավերժացնող անմար կրակի մոտ: Այս մասին հայտնում է ՀՀ ԱԳՆ կայքը: