Վերակառուցվել են Սանահինի մեխանիզացված ուղեմասը և Երևանի Ուսուցման ճանապարհային կենտրոնը

«Հարավկովկասյան երկաթուղում» վերազինումից հետո այսօր շահագործման հանձնվեց երկու արտադրական հանգույց՝ Սանահինի մեխանիզացված ուղեմասը և Երևանում գտնվող Ուսուցման ճանապարհային կենտրոնը, որտեղ ստեղծվել է նոր ուսումնատեխնիկական հրապարակ:

«Հայաստանի երկաթուղային տրանսպորտի ենթակառուցվածքն այսօր համալրվում է նորագույն բաղադրիչներով, իսկ հայ երկաթուղայինների աշխատանքային պայմանների բարելավման մասին ավելորդ է ասել»,- ասաց տրանսպորտի և կապի նախարարի տեղակալ Արթուր Առաքելյանը:

Վերակառուցման առաջին փուլի շրջանակներում վերանորոգվել և վերականգնել են Դեպոյի շենքը և արտադրամասերը։ Երկրորդ փուլի շրջանակներում տեղադրվել են հատուկ տեխնիկական սարքավորումներ, կառուցվել է երկաթուղային խոշոր տեխնիկայի վերանորոգման և տեղակայման համար նախատեսված հատուկ ծածկ:

Երևանում գտնվող Ուսուցման ճանապարհային կենտրոնի վերազինումն ուղղված է երկաթուղու աշխատողների տեխնիկական ուսուցման մակարդակի կատարելագործմանը: Կենտրոնը հագեցած է ուսումնական գործընթացի կազմակերպման համար անհրաժեշտ տեխնիկական սարքավորումներով, դասագրքերով, լոկոմոտիվային բրիգադների պրակտիկ դասընթացների համար առկա է նաև հատուկ ուսումնավարժական լոկոմոտիվը:

Մինչ Սանահինի մեխանիզացված ուղեմասի և Երևանի Ուսուցման ճանապարհային կենտրոնի բացումը տեղի ունեցավ «Հարավկովկասյան երկաթուղիներ» ՓԲԸ-ի հիմնադիրների ընդհանուր ժողովը: Արթուր Առաքելյանի թեկնածությունը հաստատվեց «ՀԿԵ» ՓԲԸ-ի տնօրենների խորհրդի անդամների կազմում: Այս մասին հայտնում է տրանսպորտի և կապի նախարարության լրատվական ծառայությունը: