Նաիրա Զոհրաբյանին թվացել է, թե Դալայ Լաման է գալիս ԱԺ, պարզվել է` նողկալի վերլուծաբանն է

Այսօր խորհրդարանական ճեպազրույցների ժամանակ, խոսելով ռուս լրագրող Կիսելյովի աղմկահարույց պահվածքի մասին, ԱԺ ԲՀԿ խմբակցության քարտուղար Նաիրա Զոհրաբյանը նշեց, որ Կիսելյովի` խորհրդարան գալու օրն ինքը զարմացել է աննախադեպ աժիոտաժից, որ ցուցաբերել են նրան սպասող պաշտոնյաներն ու լրագրողները:

«Ինձ մոտ տպավորություն էր, թե ԱԺ շենք Դալայ Լաման է մուտք գործելու, բայց երբ հարցրեցի` ո՞ւմ եք այդպես սրտատրոփ սպասում, պարզվեց, որ սպասում են մի վերլուծաբանի, որի նողկալի քծնանքն առ Պուտին ավելի նողկալի է, քան սովետպրոպագանդայի ժամանակահատվածի քծնանքը: Երբ թույլ ես տալիս, որ քո խորհրդարանում թքեն քո երեսին, մեղավորն առաջին հերթին մենք ենք»,- ասաց Նաիրա Զոհրաբյանը:

Պատգամավորը տարակուսում է, թե ինչպե՞ս կարելի էր նման ընդունելություն ցույց տալ մի կեղծ-վերլուծաբանի, որն իրեն թույլ է տվել հայերին դաս սովորեցնել:

«Բոլորս ենք մեղավոր և այն մարդիկ, որոնք նստած էին խաշած ժպիտներով, որ շովինիզմով տառապող մի տեսաբան անարգի հայ ժողովրդին»,- ասաց նա: