«Կարմիրի 60 երանգները». նոր ցուցադրություն` Հայաստանի ազգային պատկերասրահում

Հայաստանի ազգային պատկերասրահում բացվել է «Կարմիրի 60 երանգները» ցուցահանդեսը: Ներկայացված են Սանկտ Պետերբուրգում բնակվող անվանի հայ նկարիչ Աշոտ Խաչատրյանի ստեղծագործությունները:

Աշոտ Խաչատրյանը Սանկտ Պետերբուրգի նկարիչների միության վարչության անդամ է, «Սանկտ Պետերբուրգի նկարիչ» լրագրի համահիմնադիրն ու գլխավոր խմբագիրը, նա հասարակական ակտիվ գործիչ է, ինչպես նաև Ռուսաստանում և արտերկրում մի շարք ցուցահանդեսների կազմակերպիչ և մասնակից: Աշոտ Խաչատրյանի վաղ շրջանի ստեղծագործություններն աչքի են ընկնում կատարման թեթևությամբ և ազատությամբ: Նրա արվեստին նվիրված հոդվածները վերնագրված են` «Կարմիր երանգների աշխարհ», «Կարմիրը և կանաչը»:

Նկարիչն իր վերջին կտավներում հանգում է մտահղացումների մարմնավորման ավելի ընդգծված ամբողջականության: Մանրուքներն ու մանրամասները չեն թաքցնում ամենակարևորը` կերպարի հուզական ներքին լարվածությունը: Նույնիսկ վերացական նկարները ճանաչելիության և ճշմարտության զգացմունք են արթնացնում:

Ցուցահանդեսը կգործի մինչև հուլիսի 5-ը: