Կոչումը ոչ թե պարտավորեցնում է, այլ ոգևորում. Զարուհի Բաբայան

Երեկ նախագահ Սերժ Սարգսյանի հրամանով պարգևատրվել են  մշակույթի մի շարք գործիչներ: Երգչուհի, Սոֆի Դևոյանի «Պարի և հոգու թատրոն» ստուդիայի ղեկավար Զարուհի Բաբայանը ստացավ ՀՀ վաստակավոր արտիստի կոչում:

Yerkir.am-ի հետ զրույցում Բաբայանը նշեց, որ պարգևներն ու կոչումները գնահատական են, որոնք ոգևորում են, քանի որ հասկանում ես` քո անցած ճանապարհը տեսնում ու գնահատում են:

«Դա ոչ թե պարտավորեցնում է քեզ, այլ ոգևորում, քանի որ ես կարծում եմ` մարդ կա'մ անում է ինչ-որ բան, կա'մ չի անում: Շատ հազվադեպ բաներ կարող են քեզ ստիպել անել, եթե դու չունես ցանկություն: Նման կոչման արժանանալը առիթ է տալիս մտածելու, որ պետք է էլ ավելի եռանդուն լինեմ, շատ աշխատեմ, որովհետև եթե քո կողքին չի լինում հանդիսատեսի բանակը, ջերմությունն ու սերը, դու երբևէ չես կարող արժանանալ նման կոչման»,- ասաց երգչուհին` հավելելով, թե վստահ է` այդ կոչումն իր երկրպագուներին և հանդիսատեսին ևս շատ է ոգևորել:

Ի դեպ, նա նշեց նաև, որ ամռան ընթացքում պատրաստվում է նոր տեսահոլովակներ նկարահանել, որոնք սեպտեմբերին հանդիսատեսի դատին կհանձնի: Սեպտեմբերին Բաբայանը համերգով հանդես կգա ԱՄՆ-ում: