Հռոմի պապը կփորձի մեղմել լարվածությունը Մերձավոր Արևելքում

Հռոմի պապ Ֆրանցիսկոսը ժամանել է Հորդանան՝ այսպիսով սկսելով իր եռօրյա այցը Մերձավոր Արևելք: BBC-ի տեղեկացմամբ՝ Ամանի մարզադաշտում Հռոմի պապը պատարագ կմատուցի, այնուհետև կհանդիպի սիրիացի փախստականներին: Հետո Ֆրանցիսկոս պապը կմեկնի Իսրայել և Հորդանան գետի արևմտյան ափ:

Թեև պաշտոնապես այցի նպատակ է հայտարարվել ուղղափառ եկեղեցու հետ կապերի ամրապնդումը, սակայն ԶԼՄ-ները նշում են, որ Ֆրանցիսկոս պապը փորձելու է իր ազդեցությունը գործածել՝ տարածաշրջանում լարվածությունը մեղմելու համար:

Այցի ժամանակ Հռոմի պապին ուղեկցելու են մեկ րաբբի և իմամ: Ֆրանցիսկոսը հույս ունի բարելավել քրիստոնյաների, մահմեդականների և հուդայականների հարաբերությունները Ավետյաց երկրում: