ԼՂ հիմնախնդրի խաղաղ լուծումը կամ տապալումը կախված չէ համանախագահներից. Ուորլիք

ԼՂ  հակամարտության խաղաղ կարգավորման բանակցային գործընթացի հաջողությունը կամ տապալումը կախված է կողմերի քաղաքական կամքից, այլ ոչ  թե ԵԱՀԿ ՄԽ համանախագահներից որևէ մեկից։ Այս մասին հայտարարել է ԵԱՀԿ Մինսկի խմբի ամերիկացի համանախագահ Ջեյմս Ուորլիքը  ադրբեջանական АПА-ի հետ զրույցում:

«Ես շատ եմ ցանկանում աշխատել իմ ռուս և ֆրանսիացի գործընկերների հետ՝  նոր գաղափարներ առաջարկելու և կողմերին իրական բանակցությունների ուղին գտնելու հարցում օգնելու համար»,- ասել է նա՝ մեկնաբանելով հարցը, որ ադրբեջանական իշխանությունները դժգոհ են նրա գործունեությունից և Twitter-ում՝ ԼՂ հակամարտության կարգավորման վերաբերյալ գրառումներից:

Հարցին՝ ճի՞շտ էր կողմերին առաջարկել համատեղ օգտագործել Սարսանգի ջրամբարը, Ուորլիքը պատասխանել է, որ փոխադարձ որոշումը կարող է նպաստել էլեկտրաէներգիայի և ոռոգման ջրի հարցը լուծելուն, ինչպես եղել էր նախքան հակամարտության սկիզբը:

Նա հավելել է, որ համանախագահները շարունակում ենք աջակցել ցանկացած քայլի, որը կկարողանա նվազեցնել ճնշումն ու վերականգնել կողմերի միջև վստահությունը: